Arif Məlikov (en translation)

Arif Məlikov

Bəstəkar

(13.09.1933 – 09.05.2019)

Arif Cahangir oğlu Məlikov Bakıda anadan olub. Asəf Zeynallı adına musiqi məktəbində (1948), Azərbaycan Dövlət Konservatoriyasında (1953-1958, Qara Qarayevin sinfi) təhsil alıb. Bir müddət Şuşada musiqi məktəbində dərs deyib. Artıq kоnservatоriyanın ilk kursunda fоrtepianо, skripka və kvartet üçün əsərlər yazıb. 1956-cı ildə Azərbaycan bəstəkarlarının ilk qurultayında iştirak edən bəstəkar Dmitri Şоstakоviç оnun istedadını yüksək qiymətləndirib. Bu illərdə tamaşaya qоyulan “7 gözəl” və “İldırımlı yоllarla” baletləri gələcək yaradıcılığına həlledici təsir göstərir. “Məhəbbət əfsanəsi” baletinin ilk tamaşası 1961-ci ildə Leninqrad Оpera və Balet Teatrında оlub. Bundan sоnra həmin balet bütün dünyanı gəzməyə başlayıb, 63 ölkənin səhnələrində tamaşaya qоyulub. Yaradıcılığı müxtəlif janrları əhatə edir. “Məhəbbət əfsanəsi” baletinin, “Nağıl”, “Füzuli”, “Vətən”, “Metamorfozlar”, “Axırıncı aşırım” simfonik poemalarının, altı simfoniyanın müəllifidir.

Xarici film istehsalçılarının “Rüstəm haqqında dastan” (1971, rejissor Bension Kimyagərov / Tacikistan), “Ürək məsələləri” (1973, rejissor Əjdər İbrahimov / Rusiya), “Əli şimşəkli atlı” (1975, rejissor Hasan Hacıqasımov / Rusiya), “Rüstəm və Söhrab” (1976, rejissor Bension Kimyagərov / Tacikistan) filmlərinin bəstəkarıdır.

1958-ci ildən Bakı Musiqi Akademiyasında dərs deməyə başlayıb, professor (1979) və bəstəkarlıq kafedrasının müdiri kimi çalışıb. Azərbaycan Milli Elmlər Akademiyasının həqiqi üzvü olub (2014). Dövlət mükafatı laureatı (1986), “İstiqlal” (1998) və “Heydər Əliyev” ordeni (2013) mükafatçısı, Əməkdar incəsənət xadimi (1965), Azərbaycan (1978) və SSRİ Xalq artisti (1986) Arif Məlikov 2019-cu ildə vəfat edib.

FILMOQRAFIYA:

Sehrli xalat (1964, tammetrajlı bədii film) – bəstəkar
İyirmialtılar (1966, tammetrajlı bədii film) – bəstəkar
Axırıncı aşırım (1971, tammetrajlı bədii film) – bəstəkar, dirijor
Ulduzlar sönmür (1971, tammetrajlı bədii film) – bəstəkar
Qərib cinlər diyarında (1977, tammetrajlı bədii film) – bəstəkar
Qız qalası əfsanəsi (1978, animasiya filmi) – bəstəkar
İşarəni dənizdən gözləyin (1986, tammetrajlı bədii film) – bəstəkar, dirijor
Doğma sahillər (1989, tammetrajlı bədii film) – bəstəkar, dirijor
Gecə qatarında qətl (1990, tammetrajlı bədii film) – bəstəkar
Kitabi Dədə Qorqud. Səkrəyin dastanı (1990, animasiya filmi) – bəstəkar
Göylər sonsuz bir dənizdir (1995, sənədli serial) – bəstəsindən istifadə olunub
Heydər Əliyev (1999-2013, sənədli serial) – bəstələrindən istifadə olunub
Ana duasından başlanan yol (2001, qısametrajlı sənədli televiziya filmi) – bəstələrindən istifadə olunub
Tanrıya tapınan Kiş (2001, qısametrajlı sənədli televiziya filmi) – bəstələrindən istifadə olunub
Axırıncı aşırıma qədər (2002, qısametrajlı sənədli televiziya filmi) – bəstələrindən istifadə olunub
Hacı Qara (IV) (2002, tammetrajlı bədii film) – bəstəkar
Tənha ruh (2002, qısametrajlı sənədli televiziya filmi) – bəstələrindən istifadə olunub
Kitabi Dədə Qorqud. Basat və Təpəgöz (2003, animasiya filmi) – bəstəkar
Nəfəs alətləri (2004, qısametrajlı sənədli televiziya filmi) – bəstəsindən istifadə olunub
Müstəqillik yollarında (2004-2005, sənədli serial) – bəstələrindən istifadə olunub
Ecazkar fleyta (2005, qısametrajlı sənədli televiziya filmi) – bəstələrindən istifadə olunub
Mücadilə (2006, tammetrajlı sənədli televiziya filmi) – bəstəsindən istifadə olunub
Dağlı çörəyi (2007, qısametrajlı sənədli televiziya filmi) – bəstəsindən istifadə olunub
Hədiyyələr, həyəcanlar… (2007, qısametrajlı sənədli televiziya filmi) – bəstəsindən istifadə olunub
Azərbaycan motivləri (2008, qısametrajlı sənədli film) – bəstələrindən istifadə olunub
Qarabağdır Azərbaycan (2009, qısametrajlı bədii film) – bəstəsindən istifadə olunub
Əsrimin yazarıyam (2012, qısametrajlı sənədli televiziya filmi) – bəstələrindən istifadə olunub
Azərbaycan xalçaları (III) (2013, sənədli serial) – bəstələrindən istifadə olunub

Hüquqvarisi:-

Kontakt:-

Ünvan:-