Ayaz Salayev

Rejissor, ssenarist, kinoşunas.
(01.08.1960)

01.08.1960-cı ildə Bakı şəhərində ziyalı ailəsində anadan olub. Ümumittifaq Dövlət Kinematoqrafiya İnstitutunun kinoşünaslıq fakültəsində təhsil alıb. (1977-1982) O, 1983-cü ildə Azərbaycan Televiziyasında, o vaxtı heç kimin gözləmədiyi və heç kimə bənzəməyən, dünya kinosuna fərqli baxışla çıxış edən və ilk çıxışından da tamaşaçının rəğbətini qazanan “Retro” verilişinin müəllifi və aparıcısı oldu. Ayaz Salayev Moskvada aspiranturada təhsilini davam etdirib və həmin institutda “Müasir film” fənnindən dərs deyib. (1986-1988)

Azərbaycan Elmlər Akademiyasında və “Azərbaycanfilm”də redaktor vəzifəsində çalışıb. (1983-1985) “İnternyus-Azərbaycan”da çalışıb. Dünya kinosu tarixinə aid 200-ə qədər televiziya verilişlərinin müəllifidir. (“Retro” – 1979-1985, “Anlam” – 1998-2000). Almaniya-Rusiya istehsalı olan “Mühacir” (2010, rejissor Yevgeni Epşteyn) filmində çəkilib.

Onun kinoda rejissor kimi debütü sənədli filmlərlə başlamışdır. 1984-1991-ci illərdə öz ssenarisi əsasında çəkdiyi “Ordubad”, “Təkulduz”, “Ata”, “Fərqlənmə” sənədli filmlərinin arasında məşhur milyonçu Hacı Zeynalabdin Tağıyevin qızı Sara xanımın atası haqqında xatirələrinin əsasında yaradılmış tammetrajlı “Ata” sənədli filmi professionallığı ilə seçilir.

1995-ci ildə “Yarasa” bədii filmini yaratdı. “Bu filmdə həqiqi şedevrin bütün əlamətləri var”- dünya kinosunun ən nüfuzlu jurnalı “Каyye dü Sinema” (Fransa); “Bu filmlə Berlin birinci gündən uddu və bu saysız-hesabsız filmlər nümayişinə bəraət qazandırdı” – “Моnd” qəzeti (Fransa); “Filmin müəllifi-dahidir”- “Frankfurt Rundşau” qəzeti (Аlmaniya); “Yarasa” filmi dahiyanə poetik təcrübədir” – Amerika kinoakademiyasının jurnalı “Vorayyeti”; “Yalnız bu filmə görə festivala gəlməyə dəyərdi” – “Literaturnaya qazeta” (Rusiya) – bu sözlər Ayaz Salayevin “Yarasa” filmi haqqında ən nüfuzlu jurnal və qəzetlərdə yazılmışdır. Bu film müstəqilliyə qədəm qoyan Azərbaycan kinosunu dünyaya çıxardan və milli kinomuza yeni nəfəs gətirən ilk film oldu. Fransada Avropa filmlərinin beynəlxalq festivalında baş mükafata layiq görülən film 25 ölkənin beynəlxalq festivallarında nümayiş olunaraq daha çox mükafatlara layiq görüldü.

1999-cu ildə o, bir də aparıcı və müəllif qismində “Anlam” verilişi ilə televiziya ekranına -tamaşaçı ilə birbaşa ünsiyyətə çıxdı və hər birimiz üçün adi olan “anlamları” təsəvvürümüzdə yenidən, tamamilə özgə qiyafədə təqdim edərək, kino sənətinə qeyri-ənənəvi və çox orijinal yanaşma ilə çıxış etdi..

Ayaz Salayev Azərbaycan Professional Kinorejissorlar Gildiyasının yaradıcılarından və təşkilatçılarındandır. O, Kinorejissorlar Gildiyası İdarə Heyətinin üzvü olaraq bir çox beynəlxalq konfranslarda, simpoziumlarda Azərbaycan kinosunu layiqincə təmsil və təbliğ etmişdir.

ADMİU-də dərs deyir. Əməkdar incəsənət xadimidir (2000).

FİLMOQRAFİYA:

1979 – 1985 “Retro” – tv. veriliş
Evlənmək istəyirəm (1983, tammetrajlı bədii film) – redaktor
Ordubad (1983, qısametrajlı sənədli televiziya filmi) – ssenari müəllifi
Bir dəfə görmək…(1984, qısametrajlı sənədli televiziya filmi) – ssenari müəllifi
Təkəlduz (1985, qısametrajlı sənədli televiziya filmi) – ssenari müəllifi
Ata (1988, qısametrajlı sənədli film) – rejissor, ssenari müəllifi
Bir nəfər hamıya görə (1989, qısametrajlı bədii film) – aktyor
Təxribat (1989, tammetrajlı bədii film) – aktyor (gənc vəkil)
Yarasa (1995, tammetrajlı bədii film) – rejissor, ssenari müəllifi
Vahimə (1998, qısametrajlı bədii film) – aktyor (psixiatr)
Koma 0.1 saniyədə (2008, tammetrajlı bədii film) – rejissor, ssenari müəllifi, icraçı prodüser
Ağ-qara gecələr (2013, tammetrajlı bədii film) – rejissor, ssenari müəllifi, icraçı prodüser
Axınla aşağı (2014, tammetrajlı bədii film) – aktyor
Azərbaycanın elm məbədi (2015, tammetrajlı sənədli film) – rejissor
Sübhdən başlanan həyat (2015, qısametrajlı sənədli film) – rejissor
Zaman adlı qatar (2016, tammetrajlı bədii film) – aktyor
Qırmızı bağ (2016, tammetrajlı bədii film) – redaktor
Torpaq (2022, tammetrajlı sənədli film) – ssenari müəllifi
1998-2000 – “Anlam”-tv.veriliş

Əlaqə:+994 12 496 51 18; +994 50 515 04 38

Ünvan:Afiyəddin Cəlilov küç. 20, ev 18